( دوس فوگ الروح ) نصّ غنائي

( دوس فوگ الروح )
نصّ غنائي :


دوس فـوگ الروح ماگول اشعليك
آنة كل عمـــري فديته ابين اديك
دوّر ابالي وأخذ كل ذكــــرياتي
ضلمة چانت گبل ماشـوفك حياتي
أنت نصفي وروحي ترهم بس عليك
دوس فـوگ الروح ماگول اشعليك

*

أنت هم تحترگ مثلي بشوگي ليـك
وأنت هم ايسيـل دمعك بين اديـك
وانت هم اتحبني مـثلي بكل قـواك
وأنته هم ضايك عشگ نكهة هلاك
أنت شوگي وكل شي بيّه ايحن عليك
دوس فـوگ الروح ماگول اشعليك


*

أنت نبضي وأنت گــلبي وأنت ذاتي
وانت عمري وانت حلمي وأمنيــاتي
گالوا المعقول حبنة وانته مومعقول حبك
چي لـگوا بفصوص عيني امخلّي رسمك
هم مايدرون أنته وي روحي شـريك
دوس فـوگ الروح ماگول اشعليك


*

مثل سرّك آنة ما شـــايف غريب
ليـش اذوُبن من اشـوفنك قريب ؟
بالأخص لمن تگـــــلي يامهجتي
تنرسم حزوزة موضحكة اعـله شفتي
يمته ماتشتاگ گلّي وآنة اجـــيك
دوس فـوگ الروح ماگول اشعليك

2012/9/16